Salmo 90 - Papiamentu Bible 2013

SALMO 90 Mi bida ta manera un rosea: tempu ta bula, lihé nos ta bai

Orashon di Moises, e hòmber di Dios.

¹ Señor, Bo a keda un refugio di ún generashon te na otro.

² Fo'i promé ku serunan a nase i mundu a mira lus di dia, sí, fo'i tur semper i pa semper Bo ta Dios.

³ Bo ta hasi hende bolbe na tera bisando: ‘Bolbe bira stòf, yunan di hende.’

⁴ Sí, den bo bista mil aña no ta mas ku e dia di ayera ku a pasa, no mas ku un warda di anochi.

⁵ Bo ta kita hende su bida manera un soño mainta; nan ta manera yerba ku ta sali:

⁶ mainta e ta sali i ta krese, anochi ya e ta marchitá i ta seku.

⁷ Nos ta kima pa e kalor di bo ira, nos ta morto spantá pa bo furia.

⁸ Bo ta tene nos maldatnan bo dilanti, nos sekretonan den lus di bo Kara.

⁹ Ai, tur nos dianan ta kaba bou 'i bo ira, nos añanan ta pasa: un rosea!

¹⁰ Setenta aña nos bida por dura, ochenta pa esnan ku tin forsa i mayor parti ta molèster i doló; tempu ta bula, lihé nos ta bai.

¹¹ Ken konosé bo furia pisá, bo indignashon tan spantoso?

¹² Siña nos konta nos dianan, pa nos haña un kurason sensato.

¹³ Bolbe bini, SEÑOR! Te ki dia? Mustra nos, bo sirbidónan, kompashon.

¹⁴ Yena nos mainta ku bo amor i tur nos bida nos lo kanta i hubilá.

¹⁵ Duna nos alegria pa e dianan ku Bo a manda aflikshon pa nos, tur e añanan ku nos a pasa malu.

¹⁶ Mustra nos, bo sirbidónan, bo trabou, laga nos yunan mira bo gloria!

¹⁷ Mare Señor nos Dios mustra nos su kariño! Duna firmesa na obra di nos man, sí, konfirmá obra di nos man.