Salmo 9 - Papiamentu Bible 2013

SALMO 9 SEÑOR ta un fòrti pa hende oprimí

Pa maestro di kanto. Ku flùit i arpa. Salmo di David.

¹ Mi ke alabá Bo, SEÑOR, di henter mi kurason, mi ke konta di tur obra milagroso ku Bo a hasi,

² keda kontentu pa bo via i grita di legria, mi ke kanta gloria di bo nòmber, Dios Altísimo.

³ Pasobra mi enemigunan a hala atras, nan a kai i peresé dilanti di bo bista.

⁴ Bo a dikta sentensia tur na mi fabor manera hues hustu, sintá riba bo trono.

⁵ Bo a skual paganonan i kaba ku malbadonan, laga nan nòmber kai den olvido pa semper.

⁶ A kaba ku e enemigu, ruiná kompletamente! No ta menta ni nòmber dje siudatnan ku B'a tumba!

⁷ Ma SEÑOR ta sintá riba su trono pa semper, E tin tribunal prepará pa saka huisio:

⁸ sí, E ta husga mundu ku hustisia, un sentensia hustu E ta dikta riba pueblonan.

⁹ P'esei SEÑOR ta un fòrti pa hende oprimí, un fortalesa den tempu di tribulashon.

¹⁰ Esnan ku sa bo nòmber ta konfia den Bo, nunka Bo no sa bandoná, SEÑOR, esun ku buska Bo.

¹¹ Kanta salmo pa SEÑOR ku ta biba na Sion, proklamá bou di pueblonan su obranan grandi.

¹² Dios ku ta venga sanger inosente, E ta kòrda — E no ta lubidá gritamentu di pobernan.

¹³ P'esei, SEÑOR, tene piedat di mi, mira kon esnan ku ta odia mi ta flihi mi. Hiba mi leu for di boka di reino di morto,

¹⁴ pa mi por alabá tur bo obranan glorioso i grita di legria meimei di Sion pa motibu ku Abo a trese salbashon.

¹⁵ Paganonan a hoga den e pos ku nan a koba, nan pia a pega den trampa ku nan mes a pone.

¹⁶ SEÑOR a lusi! El a hasi hustisia! Mal hende a bruha den reda di nan mes mal akshon.

¹⁷ Mare hende sin Dios por bai reino di morto, tur e nashonnan ku no ke kòrda riba Dios.

¹⁸ Ma E no ta lubidá riba pobernan pa semper, ilushon di un mizerabel no ta muri bai lag'é.

¹⁹ Lanta, SEÑOR! No laga hende triunfá: laga nashonnan pagano keda husgá Bo dilanti.

²⁰ Yena nan ku sustu, SEÑOR, pa e paganonan sa ku ta hende nan ta.