Salmo 89 - Papiamentu Bible 2013

SALMO 89 Kon a para ku bo fieldat na David?

Poema didáktiko di Etan, e ezrahita.

¹ Pa semper mi ke kanta SEÑOR su fabornan, mi ke pa ún generashon tras di otro siña konosé bo fieldat fo'i mi boka.

² Mi di: ‘Bo fabor t'ei pará pa semper; ta den shelu, ei Bo ta funda bo fieldat.’

³ ‘Mi a sera un aliansa ku e hòmber ku M'a skohe, Mi a hura David, mi sirbidó, asin'akí:

⁴ Lo Mi mantené bo desendensia pa semper, pa semper un di nan lo ta sintá riba bo trono.’

⁵ O, shelunan ta gaba bo milagernan, SEÑOR, nan ta kanta bo fieldat den reunion dje sernan santu.

⁶ Ken ta manera Dios den firmamentu di shelu, ken ta parse SEÑOR den tur ser selestial?

⁷ Dios, respetá den konseho di santunan, sumamente temibel pa tur ku ta biba rònt di djE.

⁸ O SEÑOR, Dios di universo, ken ta manera Bo, tan poderoso, SEÑOR, Abo bistí ku fieldat!

⁹ Bo ta dominá soberbia di laman, si su olanan subi Bo ta plakia nan.

¹⁰ B'a bora i destrosá e mònster Rahab, ku bo man poderoso Bo a plama e enemigu.

¹¹ Shelu ta di Bo, di Bo tera ta, Bo a funda mundu ku tur loke ta yen'é.

¹² Nort i zùit t'Abo a krea; Seru di Tabor i Seru di Hermon ta kanta di legria na honor di bo nòmber.

¹³ Bo tin un brasa mashá poderoso, bo man ta fuerte, bo man drechi viktorioso.

¹⁴ Hustisia i derecho ta fundeshi di bo trono, bondat i bèrdat ta pará bo dilanti.

¹⁵ Felis ta e pueblo ku sa kon aklamá Bo, nan ta kana den lus di bo presensia, SEÑOR.

¹⁶ Bo nòmber ta nan goso dia aden dia afó, bo obranan hustu, esei ta nan orguyo.

¹⁷ Pasobra Bo ta nan splendor i nan forsa, pa motibu di bo grasia nos ta lanta kabes.

¹⁸ Pasobra Abo, SEÑOR, a skohe nos eskudo, Abo, Dios Santu di Israel, a duna nos nos rei.

¹⁹ Bo a yega di papia, den vishon ku bo fiel sirbidó i bis'é: ‘Mi a duna mi yudansa na un héroe, Mi a alsa un hóben for di pueblo.

²⁰ Mi a haña David, mi sirbidó, Mi a hunt'é ku mi zeta sagrado.

²¹ Mi man firme lo ta su sosten, mi brasa lo dun'é fortalesa.

²² Enemigu lo n' koh'é di sorpresa, malbado lo no humili'é.

²³ Dilanti dje lo Mi plèchè su enemigunan lo Mi tumba esnan ku ta odi'é.

²⁴ Mi fieldat i mi bondat lo kompañ'é, den mi nòmber lo e lanta kabes.

²⁵ Lo mi rèk su man te na laman, su man drechi te na Riu Grandi.

²⁶ L'e invoká Mi: “Bo ta mi Tata, mi Dios, mi baranka i salbashon.”

²⁷ Lo Mi hasié mi yu mayó, esun mas altu den reinan di mundu.

²⁸ Lo Mi mustr'é pa semper mi fabor, mi aliansa kuné lo keda firme.

²⁹ Su dinastia lo Mi laga keda semper i su trono tanten ku shelu t'ei.

³⁰ Ma si su yunan bandoná mi lei i no biba di akuerdo ku mi òrdunan,

³¹ si nan violá mi preseptonan i no opservá mi mandamentunan,

³² Mi ta paga nan malu ku chapara, ku hopi sla lo Mi paga nan faltanan.

³³ Ma lo Mi n' stòp di stima David, ni nenga mi fieldat n'e,

³⁴ Lo Mi no kibra mi pakto kuné, ni kambia loke M'a primintí.

³⁵ Un kos M'a hura pa mi santidat — hamas i nunka lo Mi n' gaña David —:

³⁶ Su desendensia lo biba eternamente, su trono ta pará manera solo Mi dilanti,

³⁷ manera luna ku lo t'ei pa semper, un testigu permanente na shelu.’

³⁸ Ma tòg B'a rabia ku Bo rei ungí, B'a rechas'é, nenga B'a neng'é.

³⁹ B'a kibra bo pakto kuné, bo sirbidó, B'a profaná su korona benta abou.

⁴⁰ B'a habri buraku den tur su murayanan, B'a basha su fortifikashonnan abou.

⁴¹ Tur hende ku pasa ta hasi sakeo: el a bira mofa di tur su bisiñanan.

⁴² B'a laga su agresornan hisa man na triunfo, B'a hasi tur su enemigunan kontentu.

⁴³ B'a pusha bèk su spada bon mulá. B'a keda sin dun'é bo apoyo den bataya.

⁴⁴ B'a kita su splendor for di dje i B'a tumba su trono abou.

⁴⁵ B'a hasié bieu promé ku su tempu i B'a yen'é ku bèrgwensa.

⁴⁶ Te ki dia, SEÑOR? Bo ta sigui skonde? Bo furor lo sigui kima manera kandela?

⁴⁷ Kòrda kon kòrtiku mi bida ta. Esta un sombra, e hende ku B'a krea!

⁴⁸ Ken por sigui biba sin mira morto, por salba su bida fo'i gara di abismo?

⁴⁹ Señor, unda bo promé amor a keda? Bo no a hasi David un huramentu di fieldat?

⁵⁰ Kòrda kon bo sirbidónan, Señor, ta insultá, kon mi ta wanta bofon di tantu nashon,

⁵¹ bofon di parti di bo mes enemigunan, SEÑOR, ofensa unda ku bo rei ungí pasa.

⁵² Bendishoná sea SEÑOR den tur eternidat. Amèn, sí, amèn!