Salmo 87 - Papiamentu Bible 2013

SALMO 87 Nos lombrishi ta derá den siudat di Dios

Di yunan di Korag. Un salmo. Un kantika.

^1-2 SEÑOR ta stima su siudat fundá riba serunan santu; portanan di Sion mas tantu ku tur otro bibá di Yakob.

³ Kos glorioso nan ta bisa di bo, o siudat di Dios:

⁴ ‘Mi ta konta Egipto i Babilonia den esnan ku ta rekonosé Mi; mira Filistea, Tiro i Etiopia; nan tur a nase aya!’

⁵ Di Sion tur hende lo bisa: ‘Un pa un, tur a nase aya. Dios Altísimo mes a fund'é.’

⁶ SEÑOR lo skibi den registro di e pueblonan: ‘Tal i tal hende a nase aya.’

⁷ Kantando i baliando nan lo bisa: ‘Ta den bo nos lombrishi ta derá.’