Salmo 85 - Papiamentu Bible 2013

SALMO 85 Bolbe bin biba meimei di bo pueblo i dun'é pas, SEÑOR

Pa maestro di kanto. Di yunan di Korag. Salmo.

¹ SEÑOR, Bo tabata bon pa bo tera, B'a trese kambio den suerte di Yakob.

² B'a pordoná kulpa di bo pueblo, B'a tapa tur su pikánan.

³ B'a guli tur bo rabia manda abou, B'a frena e kandela di bo furia.

⁴ Dios, nos Salbador, restourá nos, no keda disgustá ku nos mas.

⁵ Bo ta bai keda pa semper indigná, ta sigui rabia ku nos sin fin?

⁶ Bo n' por laga nos biba un bida nobo, pa bo pueblo bolbe legra den Bo?

⁷ SEÑOR, mustra nos bo amor i duna nos bo salbashon!

⁸ Mi ke skucha Dios-SEÑOR su palabra: ‘Pas!’ esei ta su mensahe pa su pueblo, pa tur ku ta su fielnan, kontal ku nan no bolbe hasi bobedat.

⁹ Salbashon ya ta serka su fielnan, su gloria ta bin biba den nos tera:

¹⁰ amor i bèrdat lo topa, hustisia i pas lo brasa otro;

¹¹ bèrdat lo brota for di tera i hustisia mira abou for di shelu.

¹² Ademas SEÑOR lo duna bonansa i nos tera lo duna kosecha.

¹³ Hustisia lo marcha su dilanti i lo habri kaminda pa su pasonan.