Salmo 84 - Papiamentu Bible 2013

SALMO 84 Mi tin gana di biba den bo kas, SEÑOR

Pa maestro di kanto. Na weis di Gat. Di yunan di Korag. Salmo.

¹ Est'un enkanto bo bibá ta, o SEÑOR di universo!

² Mi alma ta muri di anhelo pa plenchinan di tèmpel di SEÑOR; mi kurason, sí, tur mi ser ta grita di deseo pa Dios bibu.

³ Mòfi mes ta haña un kas, souchi ta traha su nèshi pa buta su yunan aden: serka bo altánan, o SEÑOR di universo, mi Rei i mi Dios!

⁴ Felis t'esnan ku ta biba den bo kas i por alabá Bo tur ora.

⁵ Felis esnan ku den Bo ta haña forsa, ku tin gana di kana bai bo tèmpel.

⁶ Pasando den Vaye di Bálsamo, nan ta kambi'é den oásis; promé awa ta yen'é ku bendishon.

⁷ Na kada paso nan forsa t'oumentá: e Dios di diosnan ta aparesé na Sion!

⁸ Skucha mi orashon, SEÑOR, Dios di universo, tende mi, o Dios di Yakob!

⁹ O Dios, nos Eskudo, pone tinu, mira esun ungí ku bon wowo.

¹⁰ Pasobra ún dia den bo plenchinan bal mi mas ku mil pafó: mihó para riba stupi di kas di mi Dios ku biba den lugánan di maldat.

¹¹ SEÑOR ta un solo, un eskudo: Dios ta duna su fabor i honor. SEÑOR no ta nenga su biennan na hende di kondukta sinsero.

¹² O SEÑOR di universo, felis ta esun ku ta konfia den Bo!