Salmo 81 - Papiamentu Bible 2013

SALMO 81 Dios ke pa nos kanta su gloria i skucha su mensahe

Pa maestro di kanto. Na weis di Gat. Di Asaf.

¹ Kanta di legria pa Dios, nos forsa, kanta gloria di Dios di Yakob.

² Entoná un salmo riba tono di tambú, di arpa melodioso i di lira.

³ Toka kachu ora luna ta nobo, ku luna yen, nos gran dia di fiesta.

⁴ Pasobra asina ta lei pa Israel, t'e mandamentu di Dios di Yakob.

⁵ El a hasié un dekreto pa Jozef, ora El a sali kontra tera di Egipto. Mi a tende un stèm ku mi n' ta'ta konosé:

⁶ ‘Mi a baha e karga fo'i bo lomba. Mi a libra bo mannan dje makutu pisá.

⁷ Den bo ansha bo a grita i Mi a salba bo, skondí den ronkamentu di bos M'a kontestá Bo, na fuente di Meriba Mi a sa ken bo ta.

⁸ Tende, mi pueblo, Mi ke avisá Bo, mare bo skucha Mi, Israel!

⁹ Boso no sirbi un Dios strañero, no adorá un Dios di afó.

¹⁰ Ami ta SEÑOR, bo Dios, Esun ku a saka bo for di tera di Egipto; habri bo boka i lo Mi yen'é.

¹¹ Pero mi pueblo no a skucha mi bos, Israel no a tende di Mi.

¹² M'a laga nan pa nan kuenta pa nan sigui nan kièr, pa nan sigui nan mes idea.

¹³ Ai, mare mi pueblo a skucha Mi i Israel por a sigui mi kamindanan!

¹⁴ Lo M'a humiliá su enemigunan mesora i hisa man kontra su opresornan.

¹⁵ Nan ku ta odia SEÑOR lo a trastia kunÉ, ma nan kastigu lo a dura pa semper.

¹⁶ Ma mi pueblo lo M'a kria ku manteka di trigo i yen'é ku stropi fo'i baranka.’