Salmo 80 - Papiamentu Bible 2013

SALMO 80 Duna nos pueblo su honor di ántes

Pa maestro di kanto. Na weis di ‘Lelinan’. Un testimonio di Asaf. Un salmo.

¹ Skucha, Wardador di Israel, ku ta guia Jozef, bo rebaño; for di bo trono ku ta riba kerubinnan manifestá Bo ku splendor dilant'i bista

² di Efraim, Benhamin i Manase. Mustra bo poder, bin salba nos!

³ O Dios, trese un kambio pa nos! Mira nos ku bista di kariño i nos lo ta salbá!

⁴ SEÑOR, o Dios di universo, te ki dia Bo ta keda sulfurá, ora bo pueblo ta resa na Bo?

⁵ B'a dun'é pan di lágrima pa kome, pa bibida un riu di aw'i wowo.

⁶ Nos t'un motibu di pleitu pa bisiñanan, nos enemigunan ta chèrchè nos.

⁷ Dios di universo, trese un kambio pa nos! Mira nos ku bista di kariño, i nos lo ta salbá!

⁸ B'a saka un mata di wendrùif fo'i Egipto, B'a plama pueblonan fo'i otro pa plant'é.

⁹ B'a traha tera p'e, pa asina tur kaminda e tira rais i yena e pais.

¹⁰ Ku su sombra el a tapa serunan, ku su rankanan seder grandioso.

¹¹ Te na laman el a saka su ramanan, te na Eufrat su spreitnan.

¹² Di kon B'a tumba su kurá di piedra, pa ken ku pasa por a kohe su frutanan?

¹³ Pa porkonan di mondi dispidié i bestianan feros kom'é hasié limpi limpi?

¹⁴ Dios di universo, bolbe! Mira abou for di shelu, ripará! Bin atendé ku bo mata di wendrùif

¹⁵ ku bo man drechi a planta komo planchi: bo mes yu ku B'a duna fortalesa.

¹⁶ Laga nan ku ke kim'é komo sushi peresé pa bo mirada furioso.

¹⁷ Laga bo man sosegá riba e hende sintá na bo lado, e yu di hende ku B'a duna fortalesa:

¹⁸ anto nos lo n' bandoná Bo nunka mas. Duna nos bida i nos lo invoká Bo!

¹⁹ SEÑOR, Dios di universo, trese un kambio pa nos! Mira nos ku bista di kariño i nos lo ta salbá!