Salmo 76 - Papiamentu Bible 2013

SALMO 76 Nos Dios glorioso i temibel

Pa maestro di kanto. Ku instrumèntnan di kuèrdè. Salmo di Asaf. Kantika.

¹ Dios ta konosí na Huda, su fama ta grandi na Israel.

² El a forma su bibá na Shalem, E tin su paradero na Sion.

³ Ei El a kibra flecha i bog, eskudo, spada, guera mes.

⁴ Resplandesiendo Bo a baha, poderoso, fo'i riba serunan yen di botin.

⁵ Turdí drumí abou, e balentenan, hòmbernan fuerte, nan man a pèrdè forsa.

⁶ Pa bo menasa, o Dios di Yakob, kabai i ginete a tolondrá.

⁷ Abo, teribel Bo ta! Ken por keda riba pia Bo dilanti, ora Bo ta baha bo rabia!

⁸ For di shelu Bo a dikta sentensia; tera a spanta keda ketu,

⁹ ora Dios a lanta pa huisio, pa salba tur humilde den pais.

¹⁰ Hende, pa rebelde k'e por ta, mester rekonosé Bo, esnan ku a skapa di e kastigu na final ta rondoná Bo.

¹¹ Hasi promesa na SEÑOR, boso Dios, i kumpli kuné; mare tur hende rònt di djE paga nan tributo na Esun ku ta digno di temor,

¹² ku ta frena orguyo di prínsipenan, ta yena reinan di mundu ku sustu.