Salmo 75 - Papiamentu Bible 2013

SALMO 75 Dios ta hues

Pa maestro di kanto. Na weis di ‘No destruí’. Salmo di Asaf.

¹ Nos ta alabá Bo, Dios, sí, nos ta alabá Bo; nos ta invoká bo nòmber i ta konta di bo milagernan.

² ‘Na e ora ku Mi mes a stipulá lo Mi husga di akuerdo ku hustisia.

³ Tera ku tur su habitantenan por tembla: Ami a ankra su pilánan.

⁴ M'a bisa hende arogante: “Stòp di broma!” i pekadó: “No kana hasi grandi.

⁵ No kana blòf hasi grandi. Pakiko tantu arogansia?” ’

⁶ No ta di pariba o pabou ni for di desierto o di serunan yudansa ta bin,

⁷ sino Dios mes ta Esun ku lo ta hues: lo E humiliá esun, anto lo E alsa un otro.

⁸ SEÑOR tin beker di furia den su man, yen di biña ku ta skuma, bon mesklá. Lo E basha for di dje, pa nan bebe, tur hasidó di maldat riba mundu, beb'é limpi limpi asta e kachikachi.

⁹ Ma lo no stòp di proklam'É i kanta salmo pa e Dios di Yakob.

¹⁰ Lo mi kita tur orguyo di malbadonan, ma bon hendenan lo kana frenta na altu!