Salmo 74 - Papiamentu Bible 2013

SALMO 74 SEÑOR, reskatá bo pueblo for di gara di enemigu

Poema didáktiko di Asaf.

¹ O Dios, di kon B'a bandoná nos pa semper, di kon bo ira ta kima kontra bo karnénan, bo rebaño?

² Kòrda riba bo komunidat, ku Bo a gana ántes ayá, e tribu ku Bo a reskatá pa el a bira bo mes propiedat; kòrda riba Seru di Sion, kaminda Bo tabata biba.

³ Bai Bo mira e ruinanan fatal, henter tèmpel destruí pa enemigu.

⁴ Bo enemigunan a grita viktoria meimei di bo lugá sagrado. Aya nan a planta nan banderanan komo señalnan bon visibel.

⁵ Ta manera nan a zuai nan machete i a kap den un mondi será;

⁶ tur relieve nan a kibra na wèrki ku gòlpinan di hacha i mukel.

⁷ Nan a pega bo tèmpel na kandela, a profaná i basha abou kas di bo nòmber.

⁸ Nan ker a kaba ku nos tur den ún kabá, tur kas di Dios den pais nan a kima.

⁹ No tin señal di Dios pa nos, ningun profeta no a keda, niun di nos no sa te ki dia.

¹⁰ O Dios, kuantu tempu mas e opresor ei lo sigui bochorná Bo Akaso e enemigu por keda profaná bo nòmber sin fin?

¹¹ Di kon Bo no ta saka bo man, Bo ta skonde bo man drechi tra'i bo lomba?

¹² Pero, Dios, fo'i prinsipio, Bo ta mi rei ku ta salba hende rònt mundu.

¹³ Ku bo forsa Bo a sples laman na dos, Bo a kibra kabes di dragonnan di laman.

¹⁴ B'a machiká kabesnan di Leviatan i a dun'é pa kuminda na tribon.

¹⁵ B'a laga fuente i riu brota. B'a seka riunan ku semper sa tin awa.

¹⁶ Dia ta di Bo, anochi ta di Bo, t'Abo ta Esun ku a duna luna i solo nan lugá.

¹⁷ Bo a fiha tur frontera di mundu, tempu di friu i di kalor, ta bo trabou.

¹⁸ Kòrda bon, SEÑOR, enemigu ta hari Bo, un pueblo bobo ta ultrahá bo nòmber.

¹⁹ No laga bo palomba pa falki! Ni keda sin kòrda nunka mas bida di bo yunan den mizeria.

²⁰ Konsiderá bo Aliansa! Pasobra tin hopi lugá skur den pais kaminda ta yen di violensia.

²¹ No laga hende oprimí bai ku kara brongosá; pobernan i hende sin derecho mare nan por alabá bo nòmber!

²² Lanta, defendé bo kaso, Dios, ripará ku hende sin sintí ta sigui ofendé Bo henter dia.

²³ No lubidá gritu mahos di bo enemigunan, e rabiamentu semper mas pisá di esnan ku ta lanta kontra Bo.