Salmo 72 - Papiamentu Bible 2013

SALMO 72 Biba rei!

Dediká na Salomon.

¹ Dios, laga rei kompartí bo mes huisio, e yu di reinan ei trese bo hustisia;

² lag'é guia bo pueblo ku hustisia i parti derecho pa bo pobernan.

³ E ora ei seru- i seritunan lo trese pas i hustisia pa bo pueblo.

⁴ L'e sali pa pobernan di pueblo, l'e salba yunan di esnan ku tin mester i lo kaba ku tur ku t'eksplotá nan.

⁵ E keda biba tanten ku tin solo i ku tin luna, un siglo tras di otro.

⁶ L'e ta manera awa riba yerba, un awa duru ku ta muha tera.

⁷ Den su tempu hustisia lo bona, pas profundo lo reina te ora luna no t'ei mas.

⁸ Lag'é manda di laman te laman, fo'i Eufrat te na skinanan di mundu.

⁹ Beduinonan lo bùig su dilanti, su enemigunan lo kai boka abou.

¹⁰ Reinan di Tarsis i di e islanan lo trese regalo p'e; reinan di Sheba i Seba lo bini pa pag'é nan tributo.

¹¹ Mare tur rei por dun'é homenahe, ohalá tur pueblo sirbié!

¹² Lo e yuda un pober ku ta pidi, un mizerabel ku ta sin protekshon.

¹³ L'e tin pena di humilde i pobernan, l'e salba bida di hende den apuro.

¹⁴ L'e libra nan di opreshon i violensia, nan bida ta presioso den su bista.

¹⁵ Biba rei! Nan dun'é oro di Sheba; mare nan resa p'e tur ora i dese'é tur kos bon tur dia bai.

¹⁶ Ku tin maishi na granèl den pais, pegá pegá te den kabes di serunan, dunando fruta manera Libanon, su tapushinan mes tantu ku yerba di kunuku.

¹⁷ Mare su nòmber keda ei pa semper, su nòmber dura mes largu ku solo; ku hende us'é pa bendishon, tur nashon yam'é fortuná!

¹⁸ Alabá sea SEÑOR Dios, Dios di Israel, kende a hasi milager. E so!

¹⁹ Alabá sea pa semper su nòmber glorioso; ku su fama yena henter mundu. Amèn, sí, amèn!

²⁰ Fin di e orashonnan di David, yu di Ishai.