Salmo 69 - Papiamentu Bible 2013

SALMO 69 Awa a subi te na mi garganta! Salba mi, SEÑOR!

Pa maestro di kanto. Na weis di ‘Lelinan’. Di David.

¹ Salba mi, o Dios, pasobra awa ya ta subi te na mi garganta!

² Mi a sak den lodo hundu, mi n' tin kaminda pa mi wanta riba dje, m'a resultá den un awa profundo, un strom a lastra mi bai kuné.

³ Mi ta morto kansá di grita, mi garganta a keda tur hers; mi wowo a bira skur skur di fiha riba mi Dios.

⁴ Mas hopi ku kabei di mi kabes ta esnan ku ta odia mi sin motibu; esnan ku ke kaba ku mi bida, e enemigunan falsu ei ta fuerte. Akaso lo mi mester duna bèk algu ku mi no a hòrta nunka?

⁵ Dios, Bo sa kon bobo mi tabata, mi no por skonde mi vupanan pa Bo.

⁶ No sigui desapuntá pa mi via, SEÑOR Dios di universo, esnan ku ta konfia den Bo; hasi pa esnan ku ta buska Bo, o Dios di Israel, no sinti bèrgwensa di mi.

⁷ Pa bo motibu mi ta wanta insulto i bèrgwensa ta tapa mi kara.

⁸ Pa mi rumannan mi a bira un strañero, un hende di afó pa yunan di mi mama.

⁹ Mi ta kima di zelo pa bo kas; e ofensanan di esnan ku ta insultá Bo ta riba mi kabes nan ta kai.

¹⁰ Ku mi mortifiká mi ku ayuno, nan ta hasi chèrchè di mi;

¹¹ ku mi bisti un lantera pa paña, nan ta tuma mi pa kèns.

¹² Na port'i stat tin hopi boka riba mi, bebedónan sa kansion riba mi.

¹³ Ma mi mes, SEÑOR, ta sigui resa na Bo; Dios, laga e ora di bo grasia yega. Skucha mi den bo gran bondat, kumpliendo ku e promesa pa salba mi.

¹⁴ Saka mi for di lodo pa mi n' hundi, libra mi di esnan ku ta odia mi; salba mi for di awa profundo,

¹⁵ pa su strom no lastra mi bai kuné, pa ningun remolino no guli mi, ni ningun pos no sera riba mi.

¹⁶ SEÑOR, tende mi, Abo riku na bondat, mira mi den bo gran mizerikòrdia.

¹⁷ No kita kara fo'i bo sirbidó. Ousilio! Rospondé mi lihé!

¹⁸ Bini serka mi, salba mi, libra mi, mi ta yen di enemigu!

¹⁹ Abo sa kon nan ta insultá mi, kon nan ta brongosá i deshonrá mi; Bo sa ken mi enemigunan tur ta.

²⁰ Nan ofensa a destrosá mi kurason, mi a keda malu pa muri. Mi a spera kompashon — tantu bal; hende pa duna mi konsuelo, ma mi no a haña ningun.

²¹ Den mi kuminda nan a bruha venenu, pa mi set nan a duna mi binager.

²² Nan komementu resultá pa nan un trampa, i pa nan kompinchinan un kui.

²³ Laga nan wowo bira skur pa nan no mira i nan kurpa debilitá pa semper.

²⁴ Deskargá bo furia riba nan, laga bo furia kandente kima nan;

²⁵ nan kampamentu keda tur desolá, nan tèntnan keda sin habitante,

²⁶ pa motibu ku nan ta persiguí un hende ku Bo a bati kaba; un ku Abo ya a dal heridá nan ta hasi redu riba dje.

²⁷ Paga nan malu ku malu; no laga nan haña pordon serka Bo;

²⁸ kita nan nòmber for di buki di bida, no inskribí nan huntu ku hende hustu.

²⁹ Ma ami, pober i yen di doló, laga bo yudansa, Dios, lanta mi.

³⁰ Mi ke honra Dios su nòmber den un kanto, engrandes'É den un himno di alabansa.

³¹ Esei lo E gusta mas tantu ku si ofres'É un toro, un bue yòn ku su kachu i patanan.

³² Ripará, humildenan, i legra; boso ku ta buska Dios, boso kurason por kohe ánimo.

³³ Pasobra SEÑOR ta skucha pobernan, E no ta despresiá su prizoneronan.

³⁴ Laga shelu i tera alab'É, laman ku tur loke ta move den dje,

³⁵ pasobra Dios ta bai salba Sion i bolbe lanta siudatnan di Huda pa hende biba den nan i poseé nan.

³⁶ Desendientenan di esnan ku ta sirbiÉ lo risibí e tera pa herensia; esnan ku ta stima su nòmber ta nan lo biba aya.