Salmo 67 - Papiamentu Bible 2013

SALMO 67 Laga tur pueblo alabá Dios pa su bendishonnan abundante

Pa maestro di kanto. Ku kompañamentu di instrumèntnan di kuèrdè. Salmo. Kantika.

¹ Mare Dios tene piedat di nos i bendishoná nos, E mustra nos sonrisa di su kara,

² pa na mundu tur hende konosé bo boluntat, den tur nashon e salbashon ku Bo a trese.

³ Mare pueblonan, o Dios, por alabá Bo, tur pueblo alabá Bo!

⁴ Mare tur pueblo por sinti nan kontentu, ohalá nan por kanta di alegria, pasobra lo Bo husga nashonnan ku hustisia, Bo ta guia tur pueblo riba mundu.

⁵ Mare pueblonan, o Dios, por alabá Bo, tur pueblo alabá Bo!

⁶ Tera a duna su kosecha: Dios, nos Dios, ker a duna bendishon.

⁷ Sí, Dios manda bendishon pa nos; laga tur skina di mundu respet'É!