Salmo 65 - Papiamentu Bible 2013

SALMO 65 Bo ta kalma nos i nos tera ku bo bondat

Pa maestro di kanto. Salmo di David.

¹ Alabansa ta toka na Bo, Dios, riba Seru di Sion.

² Bo meresé pa hende kumpli ku promesanan, o Skuchador di orashon!

³ Hende mortal, tur ta bini serka Bo ku nan peso di piká; nos faltanan a bira muchu pa mi, Abo pordoná nan!

⁴ Felis t'esun ku Bo ta skohe i yama pa biba den bo kortenan; yena nos ku e biennan di bo kas, ku santidat di bo tèmpel.

⁵ Ku obranan grandioso di hustisia Bo sa kontestá nos, o Dios, nos Salbador, speransa di mundu henter i di lamannan di mas leu,

⁶ ku a fiha serunan ku propio forsa, Abo, bistí ku poder,

⁷ ku a plakia ronkamentu di laman, boroto di nan ola i tumulto di pueblonan.

⁸ E habitantenan mas leu di mundu ta atmirá bo señalnan; Bo ta laga portanan di solo, kaminda e ta sali i ta baha resoná di alegria.

⁹ Bo a kuida tera i a muh'é, B'a hasié riku i gordo; roi di awa di Dios a bòltu pa maishi por a nase. T'asina Bo ta mira pa tera:

¹⁰ Bo ta yena su riolnan, ta hasi su klòmpinan pareu ta hasié moli ku yobida i ta bendishoná su matanan.

¹¹ Kaba Bo ta kolma aña ku tur bo biennan; kaminda Bo a pasa tin gordura.

¹² Yerb'i kunuku ta bèrdè, serunan bistí di fiesta,

¹³ kunuku ta kubrí ku karné, vaye tapá ku maishi. Tur ta grita, sí, ta kanta di alegria.