Salmo 62 - Papiamentu Bible 2013

SALMO 62 Serka Dios so mi alma ta na pas

Pa maestro di kanto. Na weis di ‘Yedutun’. Salmo di David.

¹ Serka Dios so mi alma ta na pas, ta di djE mi salbashon ta bini.

² E so ta mi baranka i salbashon, mi fòrti — nunka lo mi no tambaliá!

³ Te ki dia boso ta sigui kore basha riba un hende i gòlpi'é manera un muraya ku ta kènter, un serká ku ta serka di kai?

⁴ Nan úniko antoho ta tumb'é, fingi, esei ta nan zjilea; ku nan boka nan ta bendishoná, ma paden nan ta maldishoná.

⁵ Buska bo pas serka Dios so, mi alma, di djE so bo por keda sper'é.

⁶ E so ta mi baranka i salbashon, mi fòrti — nunka lo mi no tambaliá!

⁷ Mi salbashon i honor mi tin di Dios, Dios, mi baranka firme, mi refugio.

⁸ Mi pueblo, konfia semper den djE, deshogá bo kurason serka djE. Ta Dios, t'E ta nos refugio.

⁹ Hende: un rosea, nada mas! Hende mortal: puru ilushon! Riba balansa ta nan ta subi, tur huntu apénas un rosea.

¹⁰ No konfia den biennan ranká, no buska nada ganá ku ladronisia; si bo poseshonnan ta rende, no pega kurason na nan.

¹¹ Mas ku un bia mi a tende e palabra ku Dios a papia: ‘Poder tin su fundeshi den Dios.’

¹² Den Bo, Señor, tin tur bondat. Sí, Bo ta paga kada hende segun k'e meresé pa su aktonan.