Salmo 60 - Papiamentu Bible 2013

SALMO 60 B'a rechasá nos, SEÑOR? Bin restourá nos pueblo

Pa maestro di kanto. Na weis di ‘Lelinan di testimonio’. Ku stèm mediano. Di David. Pa siña. Ora David tabata bringa Aram di tera di e dos Riunan i Aram di Soba, i Yoab a regresá i a derotá edomitanan den Vaye di Salu: 12.000 persona.

¹ B'a rechasá nos, o Dios, B'a bruha nos filanan, Bo tabata rabiá, bolbe serka nos!

² Bo a pone tera tembla i a sker e: drecha su skernan, e ta plama fo'i otro.

³ Bo a laga bo pueblo pasa den duru, Bo a laga nos bebe un biña ku ta turdi.

⁴ Bo a duna esnan ku ta teme Bo un bandera pa hui bai n'e fo'i alkanse di flecha.

⁵ Pa bo yunan stimá por haña libertat: salba nos ku bo man fuerte, skucha nos!

⁶ Fo'i den su santuario Dios ta bisa: ‘Triunfante lo Mi parti Sihem, lo Mi midi e vaye di Sukot.

⁷ Guilead ta di Mi, di Mi ta Manase, Efraim ta e hèlmu pa tapa mi kabes i Huda lo sirbi Mi pa bastòn di mando.

⁸ Pero Moab lo ta mi palangana, pa tuma poseshon di Edom Mi ta pisa mi sambarku riba dje, riba Filistea lo Mi kanta viktoria.’

⁹ Ken lo hiba mi den e stat fortifiká, ken ta bai mi dilanti te den Edom,

¹⁰ si Abo, o Dios, a rechasá nos i no ta sali mas ku nos trupanan?

¹¹ Ai, yuda nos kontra enemigu, komo yudansa di hende ta enbano.

¹² Huntu ku Dios nos lo bringa ku kurashi, t'É lo machiká nos enemigunan.