Salmo 6 - Papiamentu Bible 2013

SALMO 6 SEÑOR, mi ta kibrá, yuda mi

Pa maestro di kanto. Ku instrumènt di kuèrdè. Na di ocho weis. Un salmo di David.

¹ SEÑOR, no kastigá mi den bo rabia, ai, no suta mi den bo furia.

² Kompashon, SEÑOR! Mi no tin forsa mas, SEÑOR, kura mi, mi kurpa ta habraká.

³ Sí, mi paden ta tur sobresaltá! Anto Abo, SEÑOR, — te ki dia?

⁴ Bolbe, SEÑOR, salba mi bida, libra mi, pasobra Bo ta bon.

⁵ Ningun morto no ta kòrda riba Bo. Ken ta alabá Bo den reino di morto?

⁶ Mi ta agotá di keha tantu, tur anochi mi ta yora riba kama, mi ta muha mi kusinchi ku lágrima.

⁷ Mi wowonan ta skur di fèrdrit, nan ta kargá: ta mi opresornan su falta!

⁸ Bai laga mi, hasidónan di maldat, SEÑOR a tende mi ta yora.

⁹ SEÑOR a skucha mi súplika, SEÑOR a aseptá mi orashon.

¹⁰ Ku kuantu bèrgwensa mi enemigunan lo ta derotá, tur pareu! Ohalá ku den ún fregá di wowo nan por retirá di bèrgwensa!