Salmo 59 - Papiamentu Bible 2013

SALMO 59 Libra mi di mi enemigunan, SEÑOR

Pa maestro di kanto. Na weis di ‘No destruí’. Di David. Ku stèm mediano. Ora Saul a manda vigilá kas di David pa mat'é.

¹ Libra mi, mi Dios, di mi enemigunan, protegé mi kontra esnan ku ta ataká mi.

² Libra mi di hasidónan di maldat, salba mi for di man di asesinonan.

³ Mira, nan ta skonde pa ataká mi, nan ta kontra mi ku tur nan forsa brutu. Sin ku m'a peka, sin krímen, SEÑOR,

⁴ sin ningun falta di mi banda nan ta kore yega sera fila. Lanta! Bin kontra mi i mira

⁵ Abo, SEÑOR, Dios di universo, kende ta Dios di Israel! Spièrta, kastigá e paganonan, no tene piedat dje traidornan.

⁶ Nan ta bini bèk anochi, nan ta grita manera kachó, miéntras nan ta lastra den siudat.

⁷ Skucha! Esta boka grandi! Nan papiá ta manera nabaha, nan ta pensa: Ken t'ei pa tende?

⁸ Ma Abo, SEÑOR, ta hari nan, ta hasi mofa di tur e paganonan!

⁹ Mi fortalesa, mi ke fiha riba Bo, sí, mi tin Dios pa mi fòrti.

¹⁰ Topa ku mi, o Dios, ku bo fabor, laga mi mira mi enemigunan kai.

¹¹ No dal nan mata ainda, pa mi pueblo no lubidá; laga nan dualu, pa bo poder, kaba dal nan, Abo, Señor, nos Eskudo!

¹² Na kada palabra di nan boka nan lepnan ta hasi piká; laga nan pega den nan mes soberbia. Pa tur mentira i maldishon ku nan ta papia:

¹³ kaba ku nan den bo furia, destruí nan pa ningun di nan no sobra. Pa hende sa ku Dios ta manda den Yakob i te na puntanan ekstremo di mundu.

¹⁴ Nan ta bini bèk anochi, nan ta grita manera kachó, miéntras nan ta lastra den siudat,

¹⁵ ta kana rònt buskando kuminda; si nan no haña basta, nan ta gruña.

¹⁶ Ma mi ta kanta gloria di bo forsa, mi ta hubilá bo bondat di mainta. Bo tabata un fòrti pa mi, un refugio na ora di mi ansha.

¹⁷ Mi Fortalesa, lo mi kanta pa Bo: Dios ta mi fòrti fuerte. E ta mi Dios bondadoso.