Salmo 58 - Papiamentu Bible 2013

SALMO 58 Kontra hues- i mandatarionan korupto

Pa maestro di kanto. Na weis di ‘No destruí’. Di David. Ku stèm mediano.

¹ Ta bèrdat, o shonnan dibino, boso ta dikta sentensia hustu, ta husga yunan di hende rektamente?

² Nò! Paden boso ta pensa solamente riba e krímennan ku boso por hasi, kalkulando ki sorto di violensia boso man por kometé den e pais.

³ E malbadonan ya tabata infiel fo'i den barika di nan mama; for di barika di nan mama nan ta dualu, e sakadónan di mentira.

⁴ Nan venenu ta manera di kolebra, víbora surdu ku ta tapa su orea

⁵ pa e no tende bos di enkantador, dje kurioso di mas profeshonal.

⁶ O Dios, kibra nan djente den nan boka, garna kachete di e leonnan, SEÑOR!

⁷ Laga nan dirti kore bai manera awa, marchitá manera yerba trapá;

⁸ mare nan bira manera slak, ku kanando ta bira pèchèpèchè; manera un yu k'a nase morto i ku nunka no ta mira lus di solo.

⁹ Promé ku bo weanan sinti kalor dje kandela di palu — sea ku e ta bèrdè o seku — ya E ta ranka nan bai kuné.

¹⁰ Esun ku a keda fiel lo gosa, ora e mira e vengansa i trapa den sanger dje malbadonan.

¹¹ Anto e ora ei hendenan lo bisa: ‘Pa hende fiel tòg tin rekompensa. Bèrdat, Dios ta eksistí! T'É ta hasi hustisia riba mundu.’