Salmo 57 - Papiamentu Bible 2013

SALMO 57 Serka Dios mi ta sigur, E ta amor i fieldat

Pa maestro di kanto. Na weis di ‘No destruí’. Di David. Ku stèm mediano. Ora el a hui pa Saul i a skonde den kueba.

¹ Tene piedat di mi, o Dios, tene piedat, serka Bo mi ta buska protekshon. Mi ke skonde den sombra di bo alanan te ora peliger pasa.

² Mi ta sklama na Dios Altísimo, e Dios ku ta hasi tantu pa mi.

³ For di shelu l'E manda mi salbashon, ya El a yama mi enemigunan afó! Dios lo manda mi su bondat i fieldat.

⁴ Mi ta drumí meimei di leon; yu di hende: nan rosea ta kandela, nan djentenan ta lansa i flecha i nan lenga un spada bon skèrpi.

⁵ Alsa bo, mi Dios, te riba shelu, laga tera ta yen di bo gloria!

⁶ Nan a pone un trampa pa mi pia, mi tabata tur tumbá; nan a koba un buraku mi dilanti, enkambio nan mes a kai aden.

⁷ O Dios, ya mi ta mi mes, mi kurason ta trankil. Mi ke kanta i toka pa Bo.

⁸ Lanta, mi alma, lanta, arpa i siter: mi ke kanta saka solo.

⁹ Mi ke alabá Bo, Señor, bou di pueblonan, kanta bo gloria bou di nashonnan,

¹⁰ pasobra bo amor ta yega te na shelu, bo fieldat ta yega te na nubianan.

¹¹ Alsa bo, mi Dios, te riba shelu, laga tera ta yen di bo gloria!