Salmo 52 - Papiamentu Bible 2013

SALMO 52 Mal hende no tin bida

Pa maestro di kanto. Komposishon di David. Ora Doeg, di Edom, a laga Saul sa: David a drenta kas di Ahimelèk.

¹ Ki bo ta broma ku maldat, kampeon di mal ehèmpel?

² Henter dia bo ta studia pèrdishon — bo lenga un nabaha mulá — sakadó di mentira!

³ Bo gusta maldat mas ku bondat, engaño mas ku honrades.

⁴ Daña kos ku bo palabra bo gusta, lenga mentiroso!

⁵ Ma Dios lo kibra bo pa kaba, kohe bo lastra fo'i bo tènt, lo E saka bo rais afó, ranka bo for di tera di bibunan.

⁶ Hende drechi lo mira, ku temor, i lo hari un hende asina:

⁷ ‘Ata e hòmber ku no a tuma Dios pa fortalesa di su bida, ku a stèns riba tur su rikesanan, birando semper pió.’

⁸ Ma ami, manera oleifi bèrdè den kas di Dios, mi ta konfia den Dios su bondat tur ora, pa semper.

⁹ Mi ke alabá Bo eternamente, pasobra Abo a hasié, i proklamá bo nòmber glorioso den presensia di bo fielnan.