Salmo 51 - Papiamentu Bible 2013

SALMO 51 Mi a peka, SEÑOR, pordoná mi

Pa maestro di kanto. Un salmo di David. Despues ku profeta Natan tabata serka dje pa motibu ku el a peka ku Bat-Shèba.

¹ Tene piedat di mi, o Dios, den bo bondat, den bo inmenso kompashon kita mi falta.

² Laba mi limpi di mi kulpa i purifiká mi di e malu ku m'a hasi.

³ Pasobra mi sa ku mi a faya, mi piká ta semper mi dilanti.

⁴ Kontra Bo, Bo so mi a peka, loke ta malu den bo bista mi a hasi. P'esei, bo sentensia ta hustu i ireprochabel ta bo huisio.

⁵ Mira, den kulpa mi a nase, pekadó mi mama a konsebí mi.

⁶ Ma Bo ta gusta bèrdat, te den fondo! Pues, inkulká den mi paden sabiduria.

⁷ Purifiká mi ku hisopo i mi ta puru, hasi mi limpi, mas blanku ku lechi.

⁸ Laga mi tende di fiesta i alegria pa mi wesunan kibrá por ta kontentu.

⁹ Kita bo bista for di mi pikánan i mi maldatnan, kita nan tur.

¹⁰ Krea den mi un kurason, Dios, ku ta limpi, hinka un spiritu nobo i fiel den mi paden.

¹¹ No tira mi leu di bo Kara, no kita bo spiritu santu fo'i mi.

¹² Salba mi! Debolbé mi mi alegria, laga un spiritu generoso ta mi forsa.

¹³ Lo mi mustra malechornan bo kaminda i pekadónan lo bolbe serka Bo.

¹⁴ Manchá di sanger mi ta — Dios, libra mi, (o Dios, Abo, mi Salbador) anto mi lenga lo gaba bo hustisia.

¹⁵ Señor, habri mi lepnan i mi boka lo kanta bo alabansa.

¹⁶ Pasobra Bo n' ta gusta sakrifisio; si m'a kima un bestia pa Bo, lo e no a kai na bo agrado.

¹⁷ Mi sakrifisio na Dios: mi kontrishon! Un kurason kibrá i arepentí, o Dios, Bo no ta despresiá.

¹⁸ Den bo kariño hasi bon na Sion, bolbe lanta murayanan di Herusalèm.

¹⁹ Lo bo gosa sakrifisionan legítimo, ofrendanan kimá henteramente; i nan lo trese toronan yòn pa ofresé nan riba bo altá.