Salmo 5 - Papiamentu Bible 2013

SALMO 5 SEÑOR ta protegé mi

Pa maestro di kanto. Ku kompañamentu di flùit. Salmo di David.

¹ Skucha mi palabranan, SEÑOR, hasi kaso di mi keho.

² Paga tinu na mi gritu di ousilio, Abo, mi Rei i mi Dios: pèrmití mi resa na Bo.

³ SEÑOR, mainta Bo ta tende mi bos; pareu di dia habri mi ta presentá Bo mi kaso i mi ta warda bo kontesta.

⁴ Bo n' ta un Dios ku gusta nada malu, Bo n' ke maldat den bo presensia.

⁵ Bo bista no ke mira arogansia, Bo ta odia malechornan.

⁶ Esnan ku ta saka mentira, Bo ta kaba ku nan. SEÑOR tin asko di hende violento i di tur gañadó.

⁷ Ma pa bo gran bondat ami sí por drenta bo kas; mi por baha kabes pa bo tèmpel i adorá Bo ku rèspèt.

⁸ SEÑOR, Bo ta hustu: guia mi meimei di tantu enemigu; habri bo kaminda pa mi.

⁹ Tur palabra fo'i nan boka ta falsu, nan paden ta korumpí; nan garganta ta un graf habrí, nan ta blo lembe hasi trastu.

¹⁰ Laga nan paga, o Dios, pa nan maldat i trompeká riba nan plannan. Nan krímennan ta hopi: kai aden! Ta kontra Bo nan ta lanta!

¹¹ Esun ku skonde serka Bo ta kontentu, lo kanta semper ku alegria. Sí, protegé nan pa nan kanta bo gloria, nan ku ta stima bo nòmber i ku lo gosa pa bo via.

¹² SEÑOR, Bo ta duna bendishon na esun ku ta hustu; Bo ta rondon'é ku kariño manera ku un eskudo.