Salmo 47 - Papiamentu Bible 2013

SALMO 47 Dios ta rei riba henter mundu

Pa maestro di kanto. Di yunan di Korag. Salmo.

¹ Pueblonan tur, bati man, aklamá Dios ku gritu di legria.

² Esta temibel SEÑOR ta, Esun altísimo, un gran Rei riba mundu henter!

³ El a pone pueblonan bou 'i nos i a buta nashonnan na nos pia.

⁴ T'É a skohe nos patria pa nos, nos ta orguyoso di dje, nos, e pueblo di Yakob ku E ta stima.

⁵ Dios a subi bou di gritu di húbilo, subi trono ku toká di tròmpèt.

⁶ Kanta salmo pa Dios, toka arpa, kanta salmo pa nos Rei, kanta p'E!

⁷ Pasobra Dios ta Rei di henter mundu, kanta p'E ku tur boso saber!

⁸ Dios ta Rei di nashonnan, E ta sintá riba su trono sagrado.

⁹ Noblesa di pueblonan a uni ku pueblo di Dios di Abraham; poderosonan di mundu ta di Dios, Esun ku ta alsá riba tur.