Salmo 46 - Papiamentu Bible 2013

SALMO 46 Dios ta na nos banda

Pa maestro di kanto. Di yunan di Korag. Na weis di ‘Bírgennan’. Kantika.

¹ Dios ta nos refugio, E ta nos fortalesa, El a resultá un yudador den mesté.

² P'esei nos no tin miedu, maske tera por tembla, òf serunan hundi den fondo di laman;

³ maske awa di laman por ronka i skuma òf serunan krak pa su forsa tumultuoso. (SEÑOR di universo — E ta ku nos. Dios di Yakob ta un fòrti pa nos.)

⁴ Brasanan di un riu ta alegrá siudat di Dios, e bibá di mas santu di Dios Altísimo.

⁵ Dios ta meimei di dje, e no por tambaliá, Dios ta yud'é ora di dia ta habri.

⁶ Pueblonan a rabia, reinonan a lanta: E ta alsa su bos i tera ta krem.

⁷ SEÑOR di universo — E ta ku nos. Dios di Yakob ta un fòrti pa nos.

⁸ Boso bin mira SEÑOR su obranan, e kosnan tremendo k'El a hasi riba tera.

⁹ E ta kaba ku guera tur kaminda riba mundu. E ta kibra bog, ta plama lansa na wèrki i garoshinan di guera E ta pega na kandela.

¹⁰ ‘Laga para i kòrda ku Ami ta Dios, alsá riba pueblonan, alsá riba tera.’

¹¹ SEÑOR di universo — E ta ku nos. Dios di Yakob ta un fòrti pa nos.