Salmo 43 - Papiamentu Bible 2013

SALMO 43 Guia mi riba kaminda pa bo tèmpel

¹ Defendé mi, mi Dios, pleita mi kousa kontra un pueblo infiel. Libra mi di hende ku ta buska blo traishon i maldat.

² Abo, mi Dios, ta mi refugio, di kon B'a bandoná mi? Di kon mi ta kana tur tristu, hostigá pa mi enemigu?

³ Manda mi bo lus i bo bèrdat, ta nan lo guia mi hiba mi na bo seru santu, na bo lugá di biba.

⁴ Ei lo mi bai na altá di Dios, Dios, mi alegria i mi goso. Lo mi kanta i toka arpa pa Bo, o Dios, ku ta mi Dios.

⁵ Mi alma, di kon bo ta flihí i bo ta keha den mi? Konfia den Dios! Lo mi bolbe alab'É, mi Salbador i mi Dios!