Salmo 41 - Papiamentu Bible 2013

SALMO 41 Un orashon den tempu di malesa

Pa maestro di kanto. Salmo di David.

¹ Felis ta esun ku ta kòrda riba pobernan: si kos ta malu p'e, Dios lo yud'é.

² SEÑOR ta ward'é, ta dun'é bida, lo e ta felis den su pais; ai, no laga enemigu hasi wega kuné!

³ SEÑOR ta sosten'é riba su kama di malu su enfermedat lo E kambia na salú.

⁴ Mi di: ‘SEÑOR, ai tene piedat, kura mi, maske mi a peka kontra Bo!

⁵ Mi enemigunan ke pa kos bai malu ku mi: “Ki dia lo e muri i l'e ta lubidá?” ’

⁶ I si un bin mira mi, e ta papia ko'i trastu, su kurason ta loko pa tende mal nobo; pareu e sali pafó e ta plam'é riba kaya.

⁷ Esnan ku ta odia mi ta kuchikuchi riba mi, kosnan di mas malu nan ta pensa di mi:

⁸ ‘Un malesa mortal a kohe su kurpa, drumí na kama asina e no ta lanta mas.’

⁹ Asta mi amigu ku mi a duna mi konfiansa i ku m'a parti mi pan kuné, a bira kontra mi.

¹⁰ Ma Abo, SEÑOR, mustra mi kompashon, lanta mi, anto e dia ei lo mi haña nan!

¹¹ Asina so lo mi sa ku Bo ta stima mi: ku Bo n' ta laga mi enemigunan kanta viktoria!

¹² Ma ami, inosente, lo Bo sostené mi i mantené mi pa semper dilanti di bo kara.

¹³ Bendishoná sea SEÑOR, Dios di Israel, den tur siglo di siglo. Amèn, sí, amèn!