Salmo 40 - Papiamentu Bible 2013

SALMO 40 SEÑOR, Bo a yega di salba mi, libra mi for di mi mizeria

Pa maestro di kanto. Salmo di David.

¹ Mi a spera, spera so den SEÑOR, El a drei mira mi i tende mi gritu di ousilio.

² El a saka mi for di e pos fatal, for di lodo di e tanki. Riba baranka El a pone mi pia laga mi bai ku paso firme.

³ El a pone un kanto nobo na mi boka, un himno pa nos Dios. Ku hopi hende por mir'é ku rèspèt i konfia den SEÑOR!

⁴ Felis ta e hende ku ta konfia firmemente den SEÑOR, ku no ta anda ku sobèrbènan, ku hende pèrdí den nan mentiranan.

⁵ Esta hopi milager Bo a hasi, SEÑOR, mi Dios! Hopi plan Bo a traha pa nos: hende no por igualá Bo. Si mester papia i konta di nan, nan ta mas ku mi por menta.

⁶ Bo no gusta sakrifisio ni ofrenda, ma Bo a habri mi orea; Bo no ke bestia kimá riba altá ni sakrifisio di pordon.

⁷ E ora ei m'a bisa: ‘Ata mi akí! Den bo buki ta skibí tokante mi:

⁸ Hasi bó boluntat, o mi Dios, esei ta mi plaser, i bo lei ta grabá den mi.’

⁹ Den gran reunion di bo pueblo m'a proklamá ku Bo ta hustu; mi no a tene mi boka será, SEÑOR, Bo mes sa!

¹⁰ Mi no a tene bo hustisia sekreto, mi a konta bo fieldat i salbashon; mi no a skonde bo bondat i bèrdat den gran reunion di bo fielnan.

¹¹ SEÑOR, nunka Bo n' ta keda sin duna mi bo mizerikòrdia; semper bo bondat i fieldat lo warda mi di peliger.

¹² Tantu desgrasia a agobiá mi ku mi n' por konta nan mas; mi pikánan ta blo persiguí mi, mi n' por mira nada otro; nan ta mas hopi ku kabei di mi kabes, mi kurason a kai.

¹³ SEÑOR, por fabor, libra mi, hasi lihé, SEÑOR, yuda mi.

¹⁴ Brongosá i humiliá e hendenan ku ke kaba ku mi bida; laga nan ku ke mira mi desgrasia hala atras yen di bèrgwensa;

¹⁵ laga esnan ku ta bisa mi: ‘Drechi pa bo!’ pèrdè abla di bèrgwensa.

¹⁶ Mare esnan ku ta buska Bo por gosa i alegrá den Bo; laga esun ku deseá pa Bo salb'é bisa: ‘SEÑOR ta grandi!’

¹⁷ Ma ami, ku ta pober, mizerabel, Señor, kòrda riba mi! Bo ta mi yudansa i Salbador, no tarda, mi Dios!