Salmo 4 - Papiamentu Bible 2013

SALMO 4 Serka SEÑOR mi bida ta fo'i peliger

Pa maestro di kanto. Ku instrumèntnan di kuèrdè. Salmo di David.

¹ Si mi yama Bo, kontestá mi, o Dios, ku semper a trata mi ku hustisia, ku den pèrtá ta duna mi rosea; tene piedat di mi, skucha mi orashon.

² Shonnan, kuantu tempu mas boso lo sigui rebahá mi honor, kana tras di kosnan sin balor i buska solamente engaño?

³ Kòrda ku SEÑOR a reservá su fiel amigu pa E mes; SEÑOR ta skucha, ora mi yam'É.

⁴ Tembla, no hasi piká, reflekshoná riba kama, den silensio.

⁵ Ofresé sakrifisionan legítimo i pone konfiansa den SEÑOR.

⁶ Tin hopi hende ku ta bisa: ‘Ken lo trese pa nos algu di bon?’ SEÑOR, mira nos ku bon wowo!

⁷ E alegria ku Bo a duna mi ta mas grandi ku hamas nan lo tin ku tur nan maishi i biña.

⁸ Ki ora ku mi bai drumi mi ta pega soño na pas; pasobra, SEÑOR, Abo so ta laga mi biba trankil.