Salmo 38 - Papiamentu Bible 2013

SALMO 38 Kulpabel, enfermo i so Mi ta malu, SEÑOR! Kura mi i pordoná mi

Salmo di David. Na un sakrifisio konmemorativo.

¹ SEÑOR, no kastigá mi den bo rabia, ai, no suta mi den bo furia!

² Bo flechanan a pega den mi kurpa, bo man a kai pisá riba mi.

³ No tin parti sin herida na mi kurpa, pa motibu di bo ira kontra mi; no a keda mi ningun wesu sano despues ku mi a hasi piká.

⁴ Mi kulpa a subi pasa riba mi kabes, manera un peso fuera di mi forsa.

⁵ Mi heridanan ta hole i ta putri, debí na mi lokura.

⁶ Mi ta kana doblá, kabes abou, henter dia mi ta kana na luto.

⁷ Mi sintura ta kima di keintura no a sobra mi ningun parti hinté.

⁸ Mi kurpa ta kibrá i rendí, mi ta grita yora di doló, di tantu batiment'i kurason.

⁹ Señor, Bo konosé tur mi anhelo, Bo no ta ignorá mi kehonan.

¹⁰ Mi kurason ta bati, forsa a bai, asta lus di mi wowo a kita.

¹¹ Mi amigunan i mi konosínan ta keda para leu for di mi plaga, mi famia ta keda na un distansia.

¹² Esnan ku ke kita mi bida a pone un trampa pa mi; esnan ku ke mi malu tur ta bisa ku nan ke kousa mi un desgrasia, henter dia nan ta plania traishon.

¹³ Ma mi ta hasi surdu, mi n' ke tende, manera un muda mi n' ta habri mi boka.

¹⁴ Mi ta manera un hende ku n' ta tende, un hende sin defensa na su boka.

¹⁵ Tur mi speransa, SEÑOR, ta den Bo, den bo kontesta, mi Señor i mi Dios.

¹⁶ Mi ta pensa: No laga nan hari mi ni kanta gloria, si mi trompeká.

¹⁷ Pasobra mi ta serka di kai, mi pena ta mi úniko kompaño.

¹⁸ Mi ke konfesá mi kulpa, mi ta flihí debí na mi piká.

¹⁹ Mi enemigunan ta bibu, poderoso, hopi ta esnan ku ta odia mi mal odiá,

²⁰ ku ta paga bondat ku maldat i ku atake mi afan pa hasi bon.

²¹ No bandoná mi, SEÑOR, mi Dios, no keda leu fo'i mi!

²² Hasi lihé, bin yuda mi, mi Señor, mi salbashon!