Salmo 30 - Papiamentu Bible 2013

SALMO 30 SEÑOR a kambia mi luto na baile

Salmo. Kantika na konsagrashon di tèmpel. Di David.

¹ Mi ke alsa Bo, SEÑOR, ku a hala mi ariba, Bo no a duna mi enemigunan gustu riba mi.

² SEÑOR, mi Dios, den mi ansha mi a sklama na Bo, anto Bo a kura mi.

³ Bo a lanta mi fo'i den reino di morto, SEÑOR. Ya m'a haña mi den esnan ku ta baha den sepulkro, pero Bo a duna mi bida nobo.

⁴ Kanta pa SEÑOR, boso tur ku ta su fielnan, alabá su nòmber santu:

⁵ pasobra su rabia ta dura djis un ratu, pero su kariño henter un bida largu. Si yora anochi, mainta tin legria.

⁶ Sigur di mi mes mi a yega di bisa: ‘Ami no ta kai, nunka di mi bida!’

⁷ Pero, SEÑOR, ta bo grasia a planta mi riba e seru sólido. Ma pareu Bo a skonde bo Kara, mi a keda tolondrá.

⁸ SEÑOR, mi a sklama na Bo, mi a pidi Señor tene piedat:

⁹ Kiko Bo ta gana si mi muri, kiko si mi baha den sepulkro? Ta stòf lo alabá Bo antó? T'e lo proklamá bo fieldat?

¹⁰ Tende, SEÑOR, tene piedat, Abo sea mi yudansa, SEÑOR!

¹¹ Bo a kambia mi luto na balia, Bo a kita mi paña di rou, kaba Bo a bisti mi di fiesta.

¹² P'esei mi ta kanta salmo pa Bo sin keda ketu nunka mas. O SEÑOR, mi Dios, mi ke alabá Bo pa semper.