Salmo 29 - Papiamentu Bible 2013

SALMO 29 Bos poderoso di SEÑOR den tormenta

Salmo di David.

¹ Duna SEÑOR, o yunan di Dios, duna SEÑOR su gloria i poder.

² Duna su nòmber e gloria debí, ador'É den su realse sagrado.

³ Ata bos di SEÑOR riba awa! Dios glorioso ta laga bos lora. SEÑOR ta zona riba awanan inmenso.

⁴ Bos di SEÑOR ta poderoso, bos di SEÑOR ta mahestuoso,

⁵ bos di SEÑOR ta kibra palunan di seder, SEÑOR ta kibra asta sedernan di Libanon.

⁶ El a pone serunan di Libanon belenkiá manera bisé i Seru di Sirion manera yu di búfalo.

⁷ Bos di SEÑOR ta kòrta kandela,

⁸ bos di SEÑOR ta pone mondinan trose, SEÑOR ta sakudí mondi di Kadesh.

⁹ SEÑOR su bos ta sakudí pal'i ekel i ta ranka kaska fo'i tronkon. Den su tèmpel tur ta grita: Gloria!

¹⁰ SEÑOR ta manda riba awanan inmenso, E ta manda komo Rei pa semper.

¹¹ SEÑOR ta duna su pueblo fortalesa, SEÑOR ta dun'é pas i bendishon.