Salmo 27 - Papiamentu Bible 2013

SALMO 27 Kaminda Dios ta, ei mi ke biba

Di David.

¹ SEÑOR ta mi lus i salbashon, di ken lo mi tin miedu? SEÑOR ta fortalesa di mi bida, pa ken lo mi tembla?

² Si malbadonan ta yega serka mi pa kome mi na bida, e enemigu- i atversarionan ei lo trompeká i lo kai.

³ Si un ehérsito mes mester changa mi, mi kurason lo n' tin miedu; si nan rondoná mi pa ataká mi, lo mi keda trankil.

⁴ Un kos so mi a roga SEÑOR, esei so mi t'anhelá: ku mi por biba den kas di SEÑOR tur dia di mi bida pa kontemplá splendor di SEÑOR i bishitá su tèmpel.

⁵ Pasobra l'E skonde mi bou 'i su dak dia di peliger; E ta warda mi fo'i peliger den su tènt, altu poné riba baranka.

⁶ Asina mi por mira abou riba mi rivalnan tur rònt i ku gritu di alegria ofresé sakrifisionan n'E den su tèmpel, lo mi toka i kanta pa SEÑOR.

⁷ SEÑOR, tende kon duru mi ta yama! Tene piedat, kontestá mi.

⁸ Bo di — mi kurason ta ripitié —: ‘Buska mi Kara.’ Bo Kara mes mi ke buska, SEÑOR!

⁹ No bira lomba pa mi, no rechasá bo sirbidó den bo rabia. Bo so ta mi yudansa! No bandoná mi laga mi sin amparo, o Dios, mi Salbador!

¹⁰ Si mi tata i mama mes bandoná mi, ta SEÑOR lo tuma mi.

¹¹ SEÑOR, mustra mi ki Bo ke pa mi hasi, den bon kaminda guia mi; kòrda, mi tin hopi enemigu.

¹² No duna gustu na esnan ku tin odio kontra mi: testigu falsu a lanta kontra mi ta menasá mi ku violensia.

¹³ Mi sa ku lo mi sinti den mi bida bondat di SEÑOR.

¹⁴ Konfia den SEÑOR, sea fuerte, bo kurason tuma kurashi. Sí, konfia den SEÑOR!