Salmo 26 - Papiamentu Bible 2013

SALMO 26 Mi ta inosente, SEÑOR

Di David.

¹ Duna mi hustisia, SEÑOR, mi a hiba un bida inosente; mi a pone mi konfiansa den SEÑOR, sin basilá ningun momento.

² Listra mi, SEÑOR, saminá mi, tèst mi kurason, mi konsenshi.

³ Mi a pone bo bondat dilanti, mi a biba segun bo bèrdat.

⁴ Mi no ta sinta ku hende falsu, mi no ta anda ku esnan ku ta trastia.

⁵ Mal kompania ta yena mi ku asko, mi n' ta bai sinta den tou di malechor.

⁶ Ami por laba man den inosensia, te pasa rònt di bo altá, SEÑOR,

⁷ pa kanta bo alabansa na bos altu i pa konta di tur bo milagernan.

⁸ SEÑOR, mi ta stima e kas, kaminda Bo tin bo bibá, e lugá di biba di bo gloria.

⁹ No benta mi afó ku malechornan, ni mi bida huntu ku asesinonan

¹⁰ ku tin krímennan pegá na nan man i nan man drechi yen di plaka mal ganá.

¹¹ Ami ke hiba un bida inosente, salba mi, mustra mi kompashon!

¹² Mi pia ta plantá den tera firme. Lo mi bendishoná SEÑOR den gran reunion di su pueblo.