Salmo 23 - Papiamentu Bible 2013

SALMO 23 SEÑOR ta mi Wardador

Salmo di David.

¹ SEÑOR ta mi Wardador, mi n' tin falta di nada;

² den kunuku di yerba bèrdè E ta pone mi sosegá. E ta hiba mi na awa trankil,

³ pa mi bolbe haña forsa. E ta guia mi den kaminda drechi fiel na su nòmber.

⁴ Maske mi pasa den e klof di mas skur, mi n' tin miedu di nada: Abo t'ei ku bo garoti i bastòn, ta nan ta mi amparo.

⁵ Bo ta drecha un mesa pa mi den bista di mi enemigu; Bo ta hunta mi kabes ku perfume, mi beker yen ta bash'afó.

⁶ Sí, bendishon i bondat ta kompañá mi tur dia di mi bida. Lo mi biba den kas di SEÑOR henter mi bida largu.