Salmo 20 - Papiamentu Bible 2013

SALMO 20 Trese viktoria pa rei, SEÑOR!

Pa maestro di kanto. Salmo di David.

¹ Mare SEÑOR por skucha bo na ora di apuro. Dios di Yakob, su nòmber protegé bo,

² manda bo ousilio for di su tèmpel i duna bo sosten for di Seru di Sion.

³ Ohalá E por kòrda riba tur bo ofrendanan, apresiá bo sakrifisionan kimá riba altá.

⁴ Mare E por kumpli ku bo íntimo deseonan i laga tur bo plannan sali eksitoso.

⁵ Anto nos por selebrá bo viktoria, hisa bandera altu na laria den nòmber di Esun ku ta nos Dios. Ohalá SEÑOR por skucha bo orashon!

⁶ Ya mi sa ku SEÑOR lo duna viktoria na su rei ungí, lo kontest'é fo'i su shelu santu, lo kai aden ku su poder pa salb'é.

⁷ Tin ku ta konfia den garoshi, den kabai, ma nos den nòmber di SEÑOR, nos Dios.

⁸ Ta nan lo trompeká i kai, ma nos ta keda firme riba pia.

⁹ SEÑOR, duna rei viktoria i skucha nos dia nos yama Bo.