Salmo 19 - Papiamentu Bible 2013

SALMO 19 Kreashon i Lei ta proklamá Dios su grandesa I

Pa maestro di kanto. Salmo di David.
I

¹ Shelu ta kanta Dios su mahestat, firmamentu ta konta di obra di su man.

² Kada dia ta anunsi'é na e dia siguiente, kada anochi ta splik'é na esun ku ta sigui.

³ Sin papiamentu, sin usa ningun bos, sin zonido pa oreanan tende,

⁴ nan yamada ta kore pasa tera henter, nan mensahe ta yega te den skinanan di mundu. El a lanta un tènt pa solo den shelu:

⁵ at'é, un novio, saliendo fo'i su kuartu nupsial, un atleta, yen di brio pa kore su kareda.

⁶ Solo ta sali na un punta di shelu, kaba ta dal su buèlta te na e otro: nada no por skapa su kalor.

II

II

⁷ Lei di SEÑOR ta perfekto, ta duna alma alivio; testimonio di SEÑOR ta fiel, ta hasi bobonan sabí.

⁸ SEÑOR su preseptonan ta rekto, ta alegrá nos kurason; SEÑOR su mandamentu ta kla, lus pa nos wowo.

⁹ Rèspèt pa SEÑOR ta puru, ta dura pa semper; SEÑOR su òrdunan ta drechi, nan ta hustu, un pa un.

¹⁰ Nan ta mas deseabel ku oro, un monton di oro puru; nan ta mas dushi ku miel fo'i kas di abeha.

¹¹ Bo sirbidó ta laga nan spièrt'é; obedesé nan, sí, ta paga!

¹² Ken ta ripará su propio fayonan? Pordoná mi pikánan skondí.

¹³ Protegé bo sirbidó kontra orguyo, no laga esei dominá mi. Anto lo mi ta perfekto i limpi di tur piká grandi.

¹⁴ Mare palabranan for di mi boka i e pensamentunan di mi kurason por ta agradabel na Bo, SEÑOR, mi Baranka i Salbador!