Salmo 150 - Papiamentu Bible 2013

SALMO 150 Tur loke tin rosea, alabá boso Kreador

¹ Alabá sea SEÑOR! Alabá Dios den su tèmpel sagrado, alab'É den firmamentu mahestuoso!

² Alab'É pa su obranan magnífiko, alab'É pa su grandesa inmenso!

³ Alab'É ku tokamentu di kachu, alab'É ku arpa i lira!

⁴ Alab'É ku tambú i ku balia, alab'É riba kuèrdènan i flùit!

⁵ Alab'É ku batimentu di platío, alab'É ku platíonan vibrante!

⁶ Tur loke tin bida i rosea duna alabansa na SEÑOR! Alabá sea SEÑOR!