Salmo 149 - Papiamentu Bible 2013

SALMO 149 Himno di viktoria

¹ Alabá sea SEÑOR! Kanta pa SEÑOR un kanto nobo; alab'É den asamblea di su fielnan!

² Laga Israel legra den su outor, yunan di Sion kanta gloria di nan Rei!

³ Nan alabá su nòmber ku balia, nan kanta salmo p'E ku arpa i tamburein.

⁴ Komo SEÑOR ta enkantá ku su pueblo, i E tin korona di viktoria pa humildenan.

⁵ Laga su fielnan gosa di e triunfo, grita kontentu fo'i den nan kampamentu

⁶ ku alabansa di Dios na nan boka i spada di dos banda den man,

⁷ pa tuma vengansa riba pueblonan i duna kastigu na nashonnan;

⁸ pa mara reinan ku kadena i nan lidernan ku bui di heru;

⁹ pa ehekutá na pia di lèter e sentensia diktá kontra nan. Esta un orguyo pa su fielnan! Alabá sea SEÑOR!