Salmo 148 - Papiamentu Bible 2013

SALMO 148 Laga henter kreashon alabá Dios su grandesa

¹ Alabá sea SEÑOR! Alabá SEÑOR for di shelu, alab'É, boso tur ayariba!

² Alab'É, kornan di angel, alab'É, su ehérsito na shelu!

³ Alab'É, solo i luna, alab'É, boso streanan briante!

⁴ Alab'É, shelu altísimo i tur awa ku tin riba firmamentu!

⁵ Laga nan alabá SEÑOR su nòmber, ya ku tur ta kreá pa su palabra.

⁶ El a fiha nan ún be pa semper, siguiendo su lei sin kibr'é nunka.

⁷ Alabá SEÑOR, fo'i riba tera, tur fondo di laman ku boso mònsternan,

⁸ kandela, eis, sneu i neblina, bientu fuerte ku ta kumpli ku su lei;

⁹ boso, seru i seritunan tur, palunan di fruta i di seder,

¹⁰ bestianan feros i di kunuku, reptilnan i paranan di pluma,

¹¹ reinan di mundu i tur pueblo, prínsipe- i huesnan di mundu;

¹² yònkuman i mucha muhénan, hende grandi i hóben tur huntu.

¹³ Laga nan alabá SEÑOR su nòmber, komo su nòmber so ta elevá, su mahestat riba shelu i tera.

¹⁴ El a duna su pueblo forsa grandi; tur su fielnan ta kanta su alabansa, yunan di Israel, su pueblo mas yegá. Alabá sea SEÑOR!