Salmo 146 - Papiamentu Bible 2013

SALMO 146 Serka Dios so tin salbashon

¹ Alabá sea SEÑOR! Mi alma, alabá SEÑOR!

² Mi ke alabá SEÑOR henter mi bida, kanta alabá mi Dios tanten ku mi tin bida i rosea.

³ No konfia den grandinan di mundu, den yu di hende ku no por salba bo.

⁴ Ora e muri e ta bolbe bira tera; a kaba ku su plannan e dia ei.

⁵ Felis ta esun ku ta buska su yudansa serka Dios di Yakob, esun ku ta pone su konfiansa henteramente den SEÑOR su Dios,

⁶ kende a traha shelu i tera, laman i tur loke tin den dje, Dios ku ta fiel pa tur eternidat,

⁷ ku ta husga na fabor di oprimidonan, ta duna pan na esnan ku tin hamber. SEÑOR ta kibra buinan di prezunan,

⁸ SEÑOR ta duna siegunan nan bista; SEÑOR ta lanta esnan ku ta kargá, SEÑOR ta stima esnan ku ta honrado.

⁹ SEÑOR ta protegé strañeronan, ta sostené yunan sin mama i biudanan, ma E ta bruha kaminda di mal hende.

¹⁰ SEÑOR ta reina pa semper, bo Dios, Sion, pa tur tempu! Alabá sea SEÑOR!