Salmo 144 - Papiamentu Bible 2013

SALMO 144 Felis ta e pueblo ku tin SEÑOR pa nan Dios

Di David.

¹ Bendishoná sea SEÑOR, nos baranka, ku a trein mi mannan pa bataya i mi dedenan den uso di arma;

² E ta mi aliado, mi fòrti, mi baluarte, Esun ku ta libra mi, mi eskudo tras di kual mi ta sigur, El a someté mi pueblo na mi.

³ Kiko hende ta pa Bo, SEÑOR, yu di hende pa Bo paga tinu n'e?

⁴ Hende ta parse un rosea, su dianan, un sombra ku ta pasa.

⁵ SEÑOR, habri bo shelu i baha, toka serunan i hasi nan huma.

⁶ Manda welek i plama e enemigunan, tira bo flechanan i pone nan hui.

⁷ Saka bo man for di ariba i salba mi, laman ta yena, saka mi fo'i dje, libra mi for di gara di strañeronan,

⁸ kende nan boka ta blo saka mentira i ku ta hisa man pa hura falsu.

⁹ Mi ke kanta un kanto nobo pa Bo, Dios, mi ke toka siter i kanta pa Bo.

¹⁰ Bo ta duna reinan viktoria i ta libra David, bo sirbidó: salba mi tambe di e spada mortal,

¹¹ libra mi for di gara di strañeronan, kende nan boka ta saka blo mentira i ku ta hisa man pa hura falsu.

¹² Ku nos yu hòmbernan por ta manera planchi, bon kriá den nan ten di hubentut; nos yu muhénan manera kolumnanan, bon akabá pa dòrna un palasio;

¹³ nos mangasinanan yen di provishon, dunando tur sorto di alimento; nos karnénan sea mil be kargá, laga nan rende den kunuku i bira mas ku dies mil;

¹⁴ nos bakanan sea bon kargá; no mas buraku den muraya, ni destiero, no mas gritu di ansha den nos kayanan.

¹⁵ Felis e nashon ku ta asina pará, felis e pueblo ku su Dios ta SEÑOR!