Salmo 143 - Papiamentu Bible 2013

SALMO 143 Den mi desesperashon Abo so por yuda mi

Salmo di David.

¹ SEÑOR, skucha mi orashon! Skucha mi pidimentu, kontestá mi, pasobra Bo ta fiel, Bo ta hustu.

² No pone bo sirbiente duna kuenta, Bo dilanti ningun hende no ta limpi.

³ Sí, un enemigu a persiguí mi, el a machiká mi na suela, el a manda mi bai biba den tiniebla, manera esnan ku a muri hopi tempu.

⁴ Mi ta serka di pèrdè speransa, mi paden ta tur sobresaltá.

⁵ Mi ta kòrda e dianan di ántes, mi ta pensa riba tur loke B'a hasi, Bo obranan ta semper mi dilanti.

⁶ Mi ta alsa mi mannan na Bo, mi tin set di Bo manera tera seku.

⁷ Skucha mi lihé, SEÑOR! Mi forsa ta serka di kaba. No kita bo bista fo'i mi, pa mi no bira manera tur esnan ku ya a baha den pos di morto.

⁸ Mustra mi tur mainta bo bondat, ta den Bo mi ta buta mi konfiansa. Mustra mi kua kaminda mi por sigui, den bo man mi ta entregá henter mi bida.

⁹ SEÑOR, libra mi for di man di mi enemigunan, serka Bo mi ta buska refugio.

¹⁰ Siña mi hasi tur lokual ta agradá Bo, Abo ku mi tin pa mi Dios! Mare bo bon spiritu por guia mi riba tereno lizu.

¹¹ SEÑOR, keda fiel na bo nòmber: Abo tene mi na bida; Bo ta hustu, pues libra mi di mi ansha.

¹² Den bo bondat, destruí mi enemigunan, kaba ku esnan ku ta buska mi pa mata, ami ku ta bo sirbidó!