Salmo 142 - Papiamentu Bible 2013

SALMO 142 Abo ta tur loke mi tin den mi bida

Poema didáktiko di David, ora e tabata den kueba. Un orashon.

¹ Ku bos altu mi ta sklama na SEÑOR, ku bos duru mi ta grita ousilio

² ta deshogá mi kurason serka djE, dun'É di konosé tur mi anshanan.

³ Mi kurason por ta serka di kai, ma Abo, SEÑOR, sa unda mi ta bai. Den e kaminda ku m'a kana nan a skonde un trampa pa mi.

⁴ Mi ta mira pariba, keda mira, ningun hende n' ta hasi kaso di mi; ningun kaminda un lugá pa mi skonde, ningun hende ku ta buska mi drechi.

⁵ SEÑOR, mi ta sklama na Bo, mi ta bisa Bo: ‘Bo ta mi refugio, Bo ta tur loke mi tin den mi bida.’

⁶ Hasi kaso di mi gritu di ousilio, pasobra mi a pèrdè tur forsa. Libra mi di esnan ku ta mi tras, nan ta muchu mas fuerte ku mi.

⁷ Saka mi fo'i dje pèrtá ku mi ta aden, pa mi bolbe alabá bo nòmber. Tur bon hende lo bin rondoná mi, despues ku Bo a trata mi ku bondat.