Salmo 140 - Papiamentu Bible 2013

SALMO 140 Warda mi di mala lenga, SEÑOR

Pa maestro di kanto. Salmo di David.

¹ SEÑOR, libra mi di mal hende, warda mi di hende violento,

² di esnan ku ta pensa maldat i henter dia ta forma kestion.

³ Nan ta hasi nan lenga skèrpi meskos ku lenga di kolebra; tras di nan lepnan tin venenu di víbora.

⁴ SEÑOR, warda mi di gara di malbadonan, protegé mi kontra hende violento, ku ta plania pa laga mi trompeká.

⁵ Hende sobèrbè a skonde trampa pa mi, kabuya nan a span i un reda, a pone laso pa mi kant'i kaminda.

⁶ Mi a bisa SEÑOR: ‘Bo ta mi Dios, SEÑOR, skucha mi gritu di ousilio.

⁷ SEÑOR, mi Dios, mi Forsa i Salbador, Bo ta mi hèlmu riba dia di kombate.

⁸ SEÑOR, no kumpli ku deseo dje malbadonan, no laga nan plannan resultá: nan kabes por susha.

⁹ E venenu di esnan ku ta changa mi, e maldishon ku ta sali fo'i nan boka, lag'é kai riba nan mes kabes.

¹⁰ Yobe karbon sendé riba nan, laga nan kai den buraku, ku nunka mas nan no por sali fo'i dje.

¹¹ Ku mala lenga n' tin rais riba mundu; hende ku ta usa violensia nan mes maldat kohe nan na kaminda i kousa nan kaida fatal.’

¹² Mi sa, SEÑOR ta duna pobernan derecho i E ta hasi hustisia na hendenan desafortuná.

¹³ Sí, hende hustu lo gaba bo nòmber i esnan ku ta semper piadoso lo permanesé den bo presensia.