Salmo 14 - Papiamentu Bible 2013

SALMO 14 Maldat i korupshon ta reina tur kaminda

Pa maestro di kanto. Di David.

¹ Hende bobo ta bisa den nan mes: ‘Ai nò, no tin Dios!’ Kos malu i horibel nan ta hasi, ningun no ta hasi bon.

² SEÑOR ta mira abou for di shelu riba yunan di hende, pa weta si tin ún ku ta sensato i ku ta buska Dios.

³ Pero tur a kohe mal kaminda, tur a daña pareu. Nò, no tin ningun ku ta hasi bon, ni sikiera ún!

⁴ Ma nan no sa nada antó, tur e malechornan, ku ta kome mi pueblo bibu, komo si fuera ta pan i ku nunka no ta resa na SEÑOR?

⁵ Te ora ku nan spanta di miedu pasobra Dios ta ku su fielnan.

⁶ Boso ke bruha propósito di un pober, ma SEÑOR ta su refugio!

⁷ O, mare salbashon di Israel por bini for di Sion! Ora SEÑOR kambia suerte di su pueblo, pueblo di Yakob lo keda kontentu, Israel lo ta di fiesta.