Salmo 129 - Papiamentu Bible 2013

SALMO 129 Hende malbado no tin bida

Kantika di peregrinashon.

¹ Kuantu be kaba fo'i mi hubentut nan a hinka mi den pèrtá, — laga Israel papia awor —

² kuantu be kaba fo'i mi hubentut nan a hinka mi den pèrtá, ma nan no a surpasá mi!

³ Plugdónan a plug mi lomba, riol hopi grandi nan a hala.

⁴ Pero, SEÑOR ku ta hustu a kòrta kabuya dje malbadonan.

⁵ Mare esnan ku ta odia Sion por hal'atras yen di bèrgwensa.

⁶ Mare nan por ta manera yerba ku ta krese riba dak plat di kas i ku ta seka promé ku rank'é;

⁷ ku esun ku ta kòrta maishi no ta yena su man kuné, i esun ku ta mar'é na bòshi no ta yena su brasa;

⁸ ni ningun ku ta pasa no ta bisa: ‘Bendishon di SEÑOR sea ku boso. Nos ta bendishoná boso den nòmber di SEÑOR.’