Salmo 125 - Papiamentu Bible 2013

SALMO 125 SEÑOR ta rondoná su pueblo ku su protekshon

Kantika di peregrinashon.

¹ Esnan ku ta konta ku SEÑOR ta manera Seru di Sion: nunka nan no ta tambaliá, nan ta firme sintá pa semper.

² Manera e serunan rondó di Herusalèm SEÑOR ta rondoná su pueblo for di awor te den tur eternidat!

³ Bastòn di maldat no por pisa tera paternal di Dios su pueblo, pa su hendenan no saka man pa gara kos di maldat.

⁴ Hasi bon, SEÑOR, pa nan ku ta bon, pa nan ku ta di bon intenshon;

⁵ ma esnan ku a bira infiel i ta sigui nan kamindanan robes, bari nan, SEÑOR, huntu ku malbadonan. Pas pa Israel!