Salmo 124 - Papiamentu Bible 2013

SALMO 124 Dios ta pará na nos banda

Kantika di peregrinashon. Di David.

¹ Si SEÑOR no a keda na nos banda, asina Israel por bisa,

² si SEÑOR no a keda na nos banda, ora hende a lanta kontra nos,

³ nan lo a kome nos bibu, den nan rabia kandente kontra nos.

⁴ Awa lo a lastra nos bai kuné, awa brutu lo a pasa riba nos,

⁵ un masa di awa furioso sigur lo a pasa riba nos.

⁶ Bendishoná sea SEÑOR! E no a laga nan djentenan sker nos.

⁷ Nos a skapa, manera un para, for di kui di yagdó. Kui a kibra i nos, nos a skapa!

⁸ Nos yudansa ta den nòmber di SEÑOR ku a traha shelu i tera.